Mesiras per interpresas en cas da direzza en connex cun COVID-19 Factsheet

Premissas generalas ed infurmaziuns

Respostas davart las premissas generalas ed ulteriuras infurmaziuns davart las mesiras per cas da direzza chattais Vus en l'internet en il Helpcenter dad easygov.ch u sut www.seco.admin.ch → Arbeit → Neues Coronavirus → Härtefallmassnahmen → Fragen und Antworten

Interpresas autorisadas

Interpresas cun sedia en il Grischun (di da referenza: 1. d'october 2020) e cun ina svieuta annuala minimala da 50 000 francs pon inoltrar ina dumonda da survegnir contribuziuns betg restituiblas, sch'ellas èn vegnidas fundadas u vegnidas inscrittas en il register da commerzi avant il 1. da mars 2020.

• Il chantun Grischun è cumpetent mo per interpresas che avevan lur sedia en il chantun Grischun il 1. d'october 2020. Sche la sedia era quel di en in auter chantun, è cumpetent quel chantun.
• L'interpresa existiva gia avant il 1. da mars 2020.
• La svieuta annuala minimala vegn calculada sin basa da las svieutas dals onns precedents: Per interpresas ch'èn vegnidas fundadas fin ils 31 da december 2017, èn decisivas las valurs mesaunas da las svieutas annualas 2018/2019; per interpresas ch'èn vegnidas fundadas suenter il 1. da schaner 2018, las svieutas a partir dal cumenzament da l'activitad commerziala fin il favrer 2020 (calculadas sin 12 mais).
• Sche l'onn da gestiun na correspunda betg a l'onn chalendar, sto vegnir calculada la svieuta mesauna dals onns precedents a maun da calculaziuns da las svieutas mensilas dal schaner 2018 fin il december 2019 resp. fin il favrer 2020.

Tut las interpresas, independentamain da la branscha e da la furma giuridica, che han in numer IDI, che genereschan almain 50 % dals custs da salari en Svizra, che n'eran betg en ina procedura da scussiun concernent las contribuziuns a las assicuranzas socialas ils 15 da mars 2020 e che n'èn betg en concurs u en liquidaziun il mument ch'ellas inoltreschan la dumonda.

L'onn 2020 u durant la perioda tschernida 2020/2021 ha l'interpresa subì ina perdita da la svieuta da passa 40 % en cumparegliaziun cun las svieutas mesaunas dals onns precedents.

• Per eruir la perdita da la svieuta vegnan cumparegliadas las svieutas dals onns precedents cun la svieuta da l'onn 2020 u cun quella da la perioda 2020/2021 ch'è vegnida tschernida da l'interpresa. L'interpresa po tscherner tranter las suandantas periodas:
  - onn 2020
  - 1. da favrer 2020 – 31 da schaner 2021
  - 1. da mars 2020 – 28 da favrer 2021
  - 16 da mars 2020 – 15 da mars 2021


• Per l'autezza da las contribuziuns na gioga la perioda tschernida nagina rolla. Sch'ina interpresa na cuntanscha betg la limita da perdita da 40 % p.ex. en cumparegliaziun cun l'onn 2020, la cuntanscha però en cumparegliaziun cun la perioda dal 1. da mars 2020 fin ils 28 da favrer 2021, po ella tscherner quella perioda.
• Tar la svieuta tutgan mo ils retgavs or da l'activitad commerziala. L'indemnisaziun per lavur reducida, la cumpensaziun dal gudogn u auters agids da corona na vegnan betg quintads tar la svieuta.

Interpresas che han stuì serrar sin ordinaziun uffiziala a partir dal 1. da november 2020 per almain 40 dis, ston mo cumprovar ina perdita da la svieuta da 15 %. Ellas èn er liberadas da prender mesiras per proteger lur liquiditad e la basa da lur chapital.

• Il chantun Grischun prevesa ina limita da perdita minimala d'almain 15 % per ina interpresa. Per eruir la perdita da la svieuta vegni sa basà sin la perioda tschernida (guardar qua survart).
• Ina serrada sin ordinaziun uffiziala è dada, sch'igl è vegnì scumandà ad ina interpresa sin basa d'ina disposiziun uffiziala da tegnair avert sia fatschenta (p.ex. manaschis da gastronomia, da divertiment e da temp liber en il Grischun suenter ils 5 da december 2020 u divers manaschis da commerzi en detagl suenter ils 18 da schaner 2021). Interpresas che n'èn betg avertas mo pervia da mancanza da clientella u mo pervia da mancanza d'incumbensas, na valan betg sco serradas sin ordinaziun uffiziala.
• Interpresas ch'èn vegnidas serradas sin ordinaziun uffiziala e che mainan ad interim in take-away u in servetsch da furniziun u da retratga, valan medemamain sco manaschis serrads sin ordinaziun uffiziala.
• Manaschis maschadads, q.v.d. interpresas cun differentas spartas da fatschenta u cun differents champs d'activitad, valan sco serrads, ubain sch'ils secturs betg serrads èn negligibels (tut en tut maximalmain 20 % da la svieuta) ubain sche tut ils champs d'activitad èn vegnids serrads sin ordinaziun uffiziala (guardar qua sutvart).

L'autezza da la contribuziun da sustegn s'orientescha a la perdita economica da l'interpresa (quai è da princip la part dals custs fixs da la perdita da la svieuta) ed è limitada a maximalmain 20 % da las svieutas mesaunas dals onns precedents ed a maximalmain 750 000 francs per interpresa. Excepziuns per ina contribuziun da sustegn da fin 1,5 milliuns francs ston vegnir concludidas a cundiziuns spezialas cun il chantun.

• Contribuziuns ch'ina interpresa ha gia survegnì dal Fond chantunal per cas da direzza (primavaira/stad 2020) vegnan deducidas da la contribuziun e quintadas vitiers a la contribuziun maximala.

Interpresas che han champs d'activitad cleramain determinads e che mainan in quint separà per questas spartas pon dumandar che tscherts criteris vegnian giuditgads separadamain per la sparta pertutgada (guardar proxim chapitel).

Interpresas cun differents champs d'activitad (manaschis maschadads) quint separà per sparta

Manaschis maschadads èn interpresas che realiseschan lur svieuta en dus u en plirs champs d'activitad ubain en duas u en pliras spartas da la fatschenta e che han separà quests champs d'activitad cun agid d'in quint per sparta.

• Exempels èn: hotel-restaurants, pasternarias/conditorias cun in sectur da gastronomia, snack-bars (take-away) cun in sectur da gastronomia, restaurants cun servetsch da furniziun; bars cun hallas da giugar e.u.v.

Manaschis maschadads valan sco serrads uffizialmain, sch'igl è vegnì serrà quel sectur, en il qual els realiseschan pli che 80 % da lur svieuta. Quests manaschis na ston pia betg cumprovar ina perdita da la svieuta da 40 %.

• Manaschis da gastronomia u manaschis da temp liber e da divertiment che realiseschan en in auter sectur ina part minimala da lur svieuta, vegnan tractads sco purs manaschis da gastronomia resp. sco purs manaschis da temp liber e da divertiment e valan pia sco serrads uffizialmain. Els na ston pia betg cumprovar ina perdita da la svieuta da 40 % en cumparegliaziun cun las svieutas annualas mesaunas 2019/2018.
• Quests manaschis na ston inoltrar nagin quint separà per sparta.

Manaschis maschadads ch'èn mo per part serrads uffizialmain (passa 20 % dal sectur da fatschenta è avert), ston cumprovar ina perdita da la svieuta da 40 %. Sch'els na reusseschan betg da far quai, pon els inoltrar in quint separà per sparta.

Manaschis maschadads che ston cumprovar ina perdita da la svieuta da 40 %, ma che na cuntanschan betg quest import, pon dumandar, inoltrond in quint separà per sparta, ch'i na vegnia betg resguardada l'entira interpresa concernent la perdita da la svieuta da 40 %, mabain mo la sparta (inoltrar in quint separà per sparta).

• Sch'ina interpresa che na vala betg sco serrada uffizialmain, na po betg cumprovar tut en tut ina perdita da la svieuta da 40 %, sin in champ d'activitad resp. en ina sparta da la fatschenta però bain, po vegnir resguardada mo quella sparta concernent la perdita da la svieuta.
• Exempel: Ina pasternaria/conditoria cun in sectur da gastronomia realisescha las svieutas a 50/50 en tuttas duas spartas. L'entira interpresa subescha ina perdita da la svieuta da 25 % e fiss pia autorisada. Il sectur da gastronomia subescha ina perdita da la svieuta da 50 %. Sch'i vegn inoltrà in quint separà per sparta per il sectur da gastronomia, po vegnir resguardada questa sparta, perquai ch'i vegn cuntanschida la limita da 40 %.

Interpresas betg autorisadas

Interpresas che han il dretg da survegnir auters agids finanzials da COVID-19, ils quals èn specifics per la branscha e vegnan pajads da la Confederaziun en ils secturs cultura, sport, traffic public u medias, n'èn da princip betg autorisadas.

• En la dumonda sto l'interpresa confermar ch'ella n'haja nagin dretg da survegnir tals auters agids finanzials en ils secturs cultura, sport, traffic public u medias.

Interpresas che realiseschan mo ina part minimala da lur svieuta en ina branscha dals secturs cultura, sport, traffic public u medias ubain che inoltreschan in quint separà per sparta, pon dumandar in sustegn per cas da direzza.

• Sco part minimala vala, sch'ina interpresa realisescha pli pauc che 20 % da sia svieuta en il sectur cultura, sport, traffic public u medias, per il qual ella ha il dretg da survegnir auters agids da COVID-19.
• Interpresas (manaschis maschadads) che han il dretg da survegnir auters agids finanzials da COVID-19 mo per in champ d'activitad (sparta), pon dumandar agids per cas da direzza per l'auter champ d'activitad, e quai cun inoltrar in quint separà per sparta.

Co vegn inoltrada ina dumonda?

Sin la pagina d'internet www.dvs.gr.ch → Mesiras per cas da direzza stattan a disposiziun infurmaziuns davart il formular da dumonda. Las dumondas ston vegnir inoltradas fin ils 30 da zercladur 2021. Agids per cas da direzza vegnan concedids er retroactivamain per l'onn 2020.

Il formular da dumonda sto vegnir inoltrà cun suttascripziun e po vegnir inoltrà sco suonda:

sin via electronica (sco scan) per upload/filetransfer u

in via electronica (sco scan) per e-mail a: haertefall@gr.ch u

per posta al: Departament d'economia publica e fatgs socials, Ringstrasse 10, 7001 Cuira

L'interpresa sto emplenir il formular da dumonda cumplettamain e vardaivlamain.

Tut ils documents necessaris ston vegnir agiuntads a la dumonda. Tut las garanzias e confermas ston vegnir consegnadas.

Sin dumondas retardadas, sin dumondas senza motivaziun suffizienta u sin dumondas senza ils documents u consentiments necessaris u senza las indicaziuns u confermas necessarias na vegni betg entrà.